قصيدة حزينة

يواسيني وانا الميت وحالـي يجبـر الدمعـات
تسيل من الذي فيني ويبكـي وهـو يواسينـي
وانا ابكي واتنهـد وارسـم بالحـزن لوحـات
يجبروني عشان امشي ورجلـي مـا تمشينـي
قتلت رعايتي بيدي قتلـت الحـب والرحمـات
حرمت النفس من حقها وانا ابكيهـا وتبكينـي
وكنه حلـم قدامـي يقيدنـي مـن الصرخـات
ابي اصحـى ولكـن مالقيـت اللـي يصحينـي
فداك القلب يايمه ومهمـا قلـت مـن كلمـات
صغيره في كبر حقـك بـس اتمنـى تعذرينـي
نهبت الفرحه من بيتي صحيح اني خسيس الذات
صحيح اني ولد طايش وكل ما أسمعـه فينـي
تجول عيونهم فينـي تفصـل منـي قياسـات
وتشيح وجوههم عنـي وكنـي غيـرت دينـي
يظنوا حزنهم اكبـر وهـم اصحـاب هالمأسـاة
وانا اتحدى اذا فيهم ربـع مـا يحتـرق فينـي
نقص قدري بعد موتك وغابـت نشـوة اللـذات
وصـار الهـم عكـازي اباكـيـه ويباكيـنـي
عطيتيني بدون حساب ولا سمعتك تقولي هـات
وانا اشرب حيل من دمك ودمـك مـا يكفينـي
يايمه ارجعي كافي ابجلس معـك لـو لحظـات
واقبل ايدك ورجلك وافرش لـك رمـش عينـي
يايمه ما تحملهم يقولوا فـات مـا قـد مـات
تعالي غيري هالقـول واطيعـك باقـي سنينـي
واترك عادة التدخين وانفذ مـا تبـي بسكـات
واصلي الفجر في المسجد قبل منتي تصحينـي
يايمه ارجعي تكفيـن وطفـي شمعـة الآهـات
ابيك انتـي ولا غيـرك علـى موتـك تعزينـي
وضميني وداويني مثـل مـا كانـت الهقـوات
ما ابي احدن يواسيني ابيـك انتـي تواسينـي
دخيلك بس لا تبكي اذا شفتـي بـي الدمعـات
انـا مـقـوى ابكـيـك اذا انـتـي تبكيـنـي

مع كل الإحترام و التقدير

بكت الجوارح مع تلك الكلمات

ما باليد حيله هذي هي السمات



تسلمو خوي ع القصيدة الحويوة

شكرا على المرور